🔆 ઈશ્વરનું વિજ્ઞાન, વૈજ્ઞાનિક ઈશ્વર! | Religiously Yours 🔆

• જો વિજ્ઞાનનું મૂળ શ્રદ્ધા હોય, તો પછી ઈશ્વરના સાક્ષાત્કારનું કેમ નહીં?  
• ઈશ્વરનો સાક્ષાત્કાર કરવા માટે સર્વપ્રથમ આપણે એના અસ્તિત્વ પર ભરોસો કરવાનું કેમ ચૂકી જઈએ છીએ?

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । પ્રાચીનકાળની વાત છે. ભારત નજીકના એક ટાપુ પર વસેલાં નાના ગામમાં એક બાળકી પોતાના પરિવાર સાથે રહેતી નથી. તેજતોખાર, ચપળ, હોંશિયાર અને શ્રદ્ધાવાન! ઈશ્વરમાં તેને એ હદ્દની આસ્થા કોઈ ધર્મગ્રંથ કે વેદ-પુરાણોનો અભ્યાસ કર્યા વગર જ તે સ્તોત્રોનું પઠન કરી શકતી! પૂર્વજો અને બાપ-દાદાઓ પાસેથી મુખપઠન પદ્ધતિથી જે જ્ઞાન અર્જિત કર્યુ હતું, તેનો સતત અભ્યાસ અને ચિંતન-મનન કર્યે રાખતી. તેના દિવસનો મોટાભાગનો સમય ઈશ્વરની ભાવભક્તિમાં પસાર થઈ જતો. સમય પસાર થતાં તે બાળકીના વખાણ ભારતવર્ષના ખૂણે-ખૂણામાં સંભળાવા લાગ્યા. તેની ખ્યાતિ ચોમેર પ્રસરવા લાગી. કોઈ ગુરુ કે ગ્રંથ વગર સંસ્કૃતના મોટા મોટા શ્લોકો અને સ્તોત્રો તેને કડકડાટ મોઢે હતાં.

બાળકીના વખાણ એક દિવસ વારાણસીના સિદ્ધયોગીએ સાંભળ્યા. તેમને થયું કે આટલી નાની બાળકી અખંડ ભક્તિરસ સાથે ભગવાનને પૂજતી હોય, તો મારે તેની મદદ કરવી જોઈએ. તે વિધિવત્ પૂજાપાઠ અને શુદ્ધ મંત્રોચ્ચારણ સાથે અનુષ્ઠાન કરી શકે એ માટે તેના જીવનમાં ગુરુની હાજરી આવશ્યક છે. આવો વિચાર કરીને તેઓ ટાપુ ભણી રવાના થયા. નાનકડી નાવડીમાં બે-ત્રણ દિવસનો પ્રવાસ ખેડીને તેઓ ટાપુ નજીક પહોંચ્યા, ત્યારે તેમને દૂરથી જ બાળકીનો મંત્રઘોષ સંભળાવા લાગ્યો. બાળકીના મુખમાંથી થતાં શુદ્ધ સંસ્કૃત ઉચ્ચારણો સાંભળીને તેઓ અંદરથી હચમચી ગયા, કારણકે તેના શ્લોકો અને સ્તોત્રમાં મોટી ક્ષતિ હતી. મૂળ શબ્દો અને એમના ભાવાર્થ બદલાઈ ચૂક્યા હતાં. સ્થિતિ એવી હતી કે બાળકીના આ ક્ષતિયુક્ત મંત્રોચ્ચારણ તેને દોષમાં પાડી શકવા સક્ષમ હતાં.

મહાત્માએ કિનારા પર હોડીને બાંધી. દોડીને બાળકીની પર્ણકુટિરમાં પહોંચી ગયા. મહિનાઓ સુધી એમણે બાળકીને વિધિ-વિધાન શીખવ્યા. મુદ્રાઓનું જ્ઞાન, ન્યાસજ્ઞાન, અનુષ્ઠાન, મંત્ર-ઉચ્ચારણ, પુરશ્ચરણ, યજ્ઞયજ્ઞાદિ સહિત તમામ પ્રકારનું ઉચ્ચતર શિક્ષણ આપ્યા બાદ આખરે એમનો જવાનો સમય નજીક આવી ગયો. બાળકીએ એમના ચરણોમાં વંદન કર્યા અને ગુરુને અશ્રુભીની આંખે રજા આપી.

ગુરુ જેવા પોતાની હોડીમાં બેસીને થોડે દૂર પહોંચ્યા હશે, ત્યાં એમને પોતાની પાછળ એક અવાજ સંભળાયો.

‘ગુરુદેવ, પુરશ્ચરણના છઠ્ઠા પગથિયાંમાં મારે કોનું ધ્યાન ધરવાનું?’ એ અવાજ બાળકીનો હતો. તે હાંફી રહી હતી. તેણે અપરાધભાવ સાથે કહ્યું ‘માફ કરશો, મેં પુરશ્ચરણની વિગતો ટાંકવામાં ભૂલ કરી હતી એટલે ફરી વખત પૂછવા માટે આવવું પડ્યું!’

ગુરુ આઘાતમાં સરી પડ્યા. એમના હોઠ સીવાઈ ગયા અને મગજ સુન્ન પડી ગયું. થોડી ક્ષણો બાદ તેઓ બોલ્યા, ‘પુત્રી, હું તો ટાપુથી ખાસ્સા અંતર પર પહોંચી ચૂક્યો છું અને મને ખ્યાલ છે ત્યાં સુધી ટાપુ પર અત્યારે એકપણ નાવડી નહોતી! તો પછી તું અહીંયા સુધી પહોંચી કેવી રીતે?’

બાળકીએ એકદમ નિર્દોષભાવે ગુરુ સામે નિખાલસ સ્મિત આપતાં કહ્યું, ‘પુરશ્ચરણની વિગતો નોંધવામાં મારી ચૂક થઈ છે, એ ખબર પડતાંની સાથે જ હું કિનારા તરફ દોડી. પરંતુ તમે ખાસ્સા દૂર નીકળી ચૂક્યા હતાં. મારા ક્ષતિયુક્ત પુરશ્ચરણથી મહામાયા જગતજનની ક્યાંક નારાજ તો નહીં થઈ જાય ને, એવું વિચારીને પાણી ઉપર દોડવાનું શરૂ કરી દીધું. મનોમન આદિ પરાશક્તિના ચરણોમાં મસ્તક ઝૂકાવી મેં એમના નામના જાપ કર્યે રાખ્યા અને હું તમારી નાવડી સુધી પહોંચી ગઈ.’

ગુરુએ કશું જ બોલ્યા વગર બાળકીના ચરણસ્પર્શ કર્યા. એમની આંખોમાં ઝળઝળિયાં હતાં. દસ વર્ષની બાળકી એક સિદ્ધ મહાયોગીને એ શીખવી ગઈ કે આસ્થા અને ભક્તિભાવ સામે અન્ય તમામ બાબતો ગૌણ બની જાય છે.

‘સાધના’ એપ્લિકેશન થકી જેઓ હાલ ખૂબ ચર્ચામાં છે, એવા પરમ ઉપાસક અને સિદ્ધયોગી ઓમ સ્વામી પોતાના વ્યાખ્યાનોમાં આ કિસ્સો અવારનવાર ટાંકે છે! આજના સમયમાં મોટેભાગે વ્યક્તિ પોતાની જિજ્ઞાસા સંતોષવા માટે ઈશ્વરને પડકાર ફેંકતો હોય છે! પરમ શક્તિના અસ્તિત્વને લલકાર આપવામાં માનવને આજકાલ ખૂબ મજા આવવા માંડી છે. બીજી બાજુ, જે ખરેખર અધ્યાત્મના માર્ગે આગળ વધવા માંગે છે તેઓ વિધિ-વિધાનને તો મહત્વ આપે છે, પરંતુ આસ્થા અને વિશ્વાસનો માર્ગ ચૂકી જાય છે, જેના લીધે જીવનના ઘણાં વર્ષો સુધી એમને ઈશ્વરત્વની અનુભૂતિ થતી નથી. કંટાળીને તે એવું સ્વીકારી બેસે છે કે ઈશ્વર જેવું તત્વ આ દુનિયામાં છે જ નહીં!

જો વિજ્ઞાનનું મૂળ શ્રદ્ધા હોય, તો પછી ઈશ્વરના સાક્ષાત્કારનું કેમ નહીં? નવીનત્તમ શોધ માટે મનમાં જેવી રીતે કોરી કલ્પના સમાન વિચાર આવવો જરૂરી છે, તો પછી ઈશ્વરનો સાક્ષાત્કાર કરવા માટે સર્વપ્રથમ આપણે એના અસ્તિત્વ પર ભરોસો કરવાનું કેમ ચૂકી જઈએ છીએ?

 (દાંડિયા બજાર વિસ્તારમાં ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(ધાર્મિક – સામાજીક કાર્યક્રમો અંગે જાણકારી આપો. )

9978918796 અથવા funrangnews@gmail.com પર મેઈલ કરો.

(ફનરંગ ન્યૂઝના વોટ્સએપ ગ્રૂપમાં જોડાવા માટે નીચેની લિન્ક પર ક્લિક કરો)

https://chat. whatsapp. com/HudhfYxRO090FnzisUr3wz