🎥 ડાર્લિંગ્સ: ધીમા ગેસ ઉપર રંધાયેલું સ્વાદિષ્ટ સિનેમા! । Film review by Parakh Bhatt 🎥

કેમ જોવી?: ડાર્ક કૉમેડીના ચાહક હો તો!

કેમ ન જોવી?: ગોકળગાયની ગતિએ ચાલનારી ફિલ્મોથી નફરત હોય તો!

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । અનુષ્કા શર્મા, દીપિકા પદુકોણ, પ્રિયંકા ચોપરા બાદ હવે નેટફ્લિક્સ ફિલ્મ ‘ડાર્લિંગ્સ’ સાથે આલિયા ભટ્ટ પણ નિર્માતા તરીકે ઝંપલાવી ચૂકી છે. ઑટીટી પ્લેટફૉર્મ આમ પણ કોઈ ડેબ્યુટન્ટ પ્રોડ્યુસર એકદમ સુરક્ષિત વિકલ્પ બની રહે છે, કારણ કે મોટેભાગે ફિલ્મ પૂરી થતાં પહેલાં જ પ્રોડ્યુસરને નફાની સાથે તેની પડતર કિંમત પણ પાછી મળી જાય છે. નેટફ્લિક્સ આમ પણ ભારતીય પ્રેક્ષકોને પોતાના તાબા હેઠળ લાવવાના ભરપૂર પ્રયત્નો કરી રહ્યું છે. હૉટસ્ટાર અને એમેઝોન પ્રાઇમ વીડિયોની સામે નેટફ્લિક્સ હજુ પણ વામણું પૂરવાર થઈ રહ્યું છે. બીજી મહત્વની વાત એ કે, ‘ડાર્લિંગ્સ’ની પ્રોડ્યુસર તો ઠીક, ડિરેક્ટર જસ્મીત કે. રીનએ પણ પહેલી જ વખત દિગ્દર્શનની ધુરા સંભાળી છે!

મુંબઈમાં રહેતાં પતિ-પત્ની હમઝા શેખ (વિજય વર્મા) અને બદરુ (આલિયા ભટ્ટ)ની વાત. જૂની વાર્તા, જેમાં દારૂડિયા પતિના હાથે પત્ની ઘરેલું હિંસાનો ભોગ બની રહી હોય અને તેની મારપીટ સહન કરતી હોય! ટ્વિસ્ટ ત્યાં આવે છે, જ્યારે એક દિવસ પત્ની બદલો લેવાની શરૂઆત કરે છે. અને એ પણ એક-બે નહીં, સેંકડો તક આપ્યા બાદ! આ કામમાં બદરુની મા શમશુનિસા અન્સારી (શેફાલી શાહ), ઝુલ્ફી (રોશન મેથ્યુ) અને કાસિમ (રાજેશ શર્મા) તેની મદદ કરે છે! ફિલ્મના લેખક વિજય મૌર્ય પોતે પોલીસ ઇન્સ્પેક્ટરની ભૂમિકામાં છે, જેઓ આ સમગ્ર કેસમાં શરૂઆતથી જ સંકળાયેલાં હોય છે.

મજાની વાત છે, ફિલ્મનો વિષય! ડાર્ક કૉમેડી. ભારતીય સિનેમામાં ઓછો ખેડાયેલો પ્રકાર. જેવી રીતે હોરર કૉમેડીનો પ્રકાર રાજકુમાર રાવ અને શ્રદ્ધા કપૂર અભિનીત ‘સ્ત્રી’ ફિલ્મ બાદ ફરી ચલણમાં આવ્યો છે, એવી જ રીતે ડાર્ક કૉમેડી જોન્રેની ફિલ્મો ‘ડાર્લિંગ્સ’ બાદ વધુ બને તો નવાઈ નહીં! વિદ્યા બાલન અભિનીત ‘કહાની’ જેવી કલર-પેલેટ અને ટેક્સચરમાં બનેલી ફિલ્મ. ઉપરથી કૉમેડી અને હ્યુમરનો મસાલો ભભરાવ્યો હોય એટલે જલ્સા જ જલ્સા પડે! એમાં પણ મિકા સિંઘના અવાજમાં ગવાયેલું ‘ડાર્લિંગ્સ’ ગીત ફિલ્મના મૂડને એલિવેટ કરવાનું કામ કરે.

ડિરેક્ટર તરીકે જસ્મીતે બહુ જ ધારદાર કામ કર્યુ છે. સ્ક્રિપ્ટ-સેન્સ બાબતે આલિયાએ પણ ફરી મેદાન માર્યુ છે. વિજય વર્મા અને શેફાલી શાહ તો રાબેતા મુજબ જોરદાર પર્ફોમન્સ આપી ચૂક્યા છે. હા, ફિલ્મની પેસ ધીમી લાગી શકે, ફર્સ્ટ-હાફમાં કંઈક અંશે કંટાળી પણ જવાય… આમ છતાં ફિલ્મને પડતી મૂકી દેવાની ઈચ્છા ન થાય! ધીરે ધીરે ફરી ફિલ્મ પાટા ઉપર ચડે. ટૂંકમાં કહેવું હોય તો, ધીમા ચૂલા ઉપર રાંધવામાં આવેલાં ધાનની માફક બનેલી આ ફિલ્મ ડાર્ક-લોહિયાળ કૉમેડી જોવા ટેવાયેલા પ્રેક્ષકોને ચોક્કસ ગમશે.

bhattparakh@yahoo.com

ક્લાયમેક્સ: એમેઝોન પ્રાઇમ પર રીલિઝ થયેલી ‘ક્રેશ કૉર્સ’ વિશે પણ આ અઠવાડિયે માર્કેટ ગરમ છે! ચેતન ભગત જેવા એક્સ-એન્જિનિયર અને બેંકરને (અત્યારે બેસ્ટ-સેલિંગ રાઇટર) તેના પ્રમોશન માટે તોતિંગ રકમ આપવામાં આવી હોય, એટલે જોવું તો રહ્યું જ!

(ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(સંપર્ક)

ધાર્મિક – સામાજીક કાર્યક્રમો કે સમાચાર અંગે જાણકારી આપવા માટે 9978918796 પર વોટ્સએપ કરો અથવા કોલ કરો. અથવા તો funrangnews@gmail.com પર મેઈલ કરો.

(WhatsApp Group Link)

Funrang newsના વોટ્સએપ ગૃપમાં જોડાવા માટે આ લિન્ક પર ક્લિક કરો. https://chat. whatsapp. com/HudhfYxRO090FnzisUr3wz જેમને વોટ્સએપ ગૃપમાં એડ કરવા હોય એમને ન્યૂઝ ફોરવર્ડ કરો.