🎥 લાઇગર: નામ બડે, દર્શન છોટે! | Liger Film review by Parakh Bhatt 🎥

કેમ જોવી?: આંધળા, બહેરા અને મૂંગા હો તો!

કેમ ન જોવી?: આ લેખ વાંચ્યો હોય તો!

[Funrang Founder / Editor – Mr. Mehulkumar Vyas – 9978918796]

પરખ ભટ્ટ । ફિલ્મ જોયા બાદ થિયેટરમાંથી બહાર નીકળતી વખતે મોટે મોટેથી ડચકારા બોલાવતાં અને નિઃસાસા નાંખતા પ્રેક્ષકો જોયા છે? જો નહીં જોયા હોય, તો ‘લાઇગર’ જોઈને બહાર નીકળતી ઑડિયન્સની પ્રતિક્રિયા જોઈ લેજો. આ અભરખા પણ પૂરા થઈ જશે!

‘ધર્મા પ્રૉડક્શન્સ’ના સર્વેસર્વા કરણ જોહરે પોતાની ફિલ્મોને બૉક્સ-ઑફિસ પર ઊંધે માથે પછડાતી બચાવવા માટે ‘હાઇબ્રિડ સિનેમા’નો કૉન્સેપ્ટ અમલમાં મૂકી દીધો છે. સાઉથ ઇન્ડિયન ફિલ્મ ઇન્ડસ્ટ્રી અને હિન્દી ફિલ્મ-ઇન્ડસ્ટ્રીના કલાકારોનું ભેળસેળિયું મિશ્રણ પ્રેક્ષકો સામે મૂકવાનો તેનો પહેલોવહેલો પ્રયોગ જ ભયંકર હદ્દે નિષ્ફળ કહી શકાય એવો નીવડ્યો છે! અર્જુન રેડ્ડી જેવી અફલાતુન સુપરહિટ ફિલ્મ આપનાર વિજય દેવરાકોન્ડાને કયા કાળચોઘડિયે ‘લાઇગર’ ફિલ્મ સાઇન કરવાની કુબુદ્ધિ સૂઝી હશે, એ તો ભગવાન જ જાણે!

મુંબઈ આવીને પોતાના દીકરા લાઇગર (વિજય દેવરાકોન્ડા)ને એમ.એમ.એ. – મિક્સ્ડ માર્શલ આર્ટ્સ – માં વર્લ્ડ-ચેમ્પિયન બનાવવા માંગતી બાલામણિ (રામ્યા ક્રિષ્ણન) તેને કૉચ ક્રિસ્ટોફર (રોનિત રોય) પાસે જઈને તાલીમ આપવાની વાત કરે છે. પ્રેમ અને લાગણીના તાણાવાણાથી દૂર રહેવામાં અને રાખવામાં માનતી બાલામણિ પોતાના દીકરા લાઇગરના જીવનમાં આવેલી છોકરી તાન્યા (અનન્યા પાંડે)થી સખત ચીડાઈ જાય છે. પરંતુ પ્રેમમાં પૂરેપૂરો ડૂબી ગયેલો લાઇગર તેની માતાની વાત સાંભળતો નથી. ત્યારબાદ રાબેતા મુજબ, બ્રેક-અપ સ્ટોરી અને ક્લાયમેક્સ! કોઈ થ્રિલ કે જુસ્સા વગર ફક્ત રન-ટાઇમ વધારવા માટે ખેંચાતી ફિલ્મ માથાનો ત્રાસ છે!

ફિલ્મનું એકમાત્ર સબળ પાસું છે: વિજય દેવરાકોંડાનું કસાયેલું બાવડેબાજ શરીર! પોતાના બૉડી-ટ્રાન્સફૉર્મેશન ઉપર કરેલું હાર્ડ વર્ક અહીં દેખાય છે. પણ ફિલ્મને એ જોવાલાયક બનાવી શકતું નથી એ કમનસીબી છે. તેના અભિનયમાં કંઈ ઉકાળી લેવા જેવું નથી. એક્શન-સિક્વન્સ કે ફાઇટિંગના દ્રશ્યો બાલિશ અને વધુ પડતાં કૃત્રિમ જણાઈ આવે છે. રામ્યા ક્રિષ્ણનને હજુ પણ પ્રેક્ષકો ‘બાહુબલિ’ની મા તરીકે જ પ્રેક્ષકો જુએ એવું રિપીટેટિવ પર્ફોમન્સ એમના તરફથી મળ્યું છે. આંખોના ડોળા ફાડવા, વગર કારણની ચીસો ને બૂમબરાડા પાડ્યે રાખવા એ હવે રામ્યા ક્રિષ્ણનની ઓળખાણ બની ગઈ છે. અનન્યા પાંડે! આ છોકરી વિશે હું કંઈ ન લખું એમાં જ મારા વાચકોની ભલાઈ છે, કારણકે ગાળ અથવા અપશબ્દ સિવાય એના વિશે લખવા જેવું બીજું કંઈ સૂઝી નથી રહ્યું. કરણ જોહરના દમ ઉપર ચાલનારી અને ફિલ્મો મેળવનારી આ છોકરી હવે એક્ટિંગ બંધ કરી દે એમાં આખી દુનિયાનું અને બૉલિવૂડનું ભલું થશે. મકરંદ દેશપાંડે અને માઇક ટાઇસનના પ્લોટમાં પણ ખાસ કંઈ છે નહીં!

સૌથી મોટું નબળું પાસું છે, ફિલ્મની વાર્તા! કોઈ ધડ-માથા વગરની સ્ટોરી, ગમે ત્યારે ટપકી પડતાં ગ્લેમરસ ગીતો અને માથામાં હથોડા સમાન પૂરવાર થતાં વાહિયાત સંવાદોએ ફિલ્મની પથારી ફેરવી નાંખી છે. ડિરેક્ટર-રાઇટર પુરી જગન્નાથ પાસે આવી અપેક્ષા તો બિલ્કુલ નહોતી રાખી. કોઈ સેન્સ વગરની સ્ક્રિપ્ટ અને ઢંગધડા વગરનો ક્લાયમેક્સ!

ગયા જન્મમાં મેં નક્કી કોઈ મહાપાપ કર્યુ હોવું જોઈએ કે મારે ‘લાઇગર’ જોવાનો વખત આવ્યો. ભગવાન તમને આ નર્કતુલ્ય પીડામાંથી બચાવે, એવી પ્રાર્થના.

bhattparakh@yahoo.com

ક્લાયમેક્સ: ગઈકાલે જ સમાચારમાં વાંચ્યું કે અનન્યા પાંડેની મમ્મી ભાવના પાંડેએ ઇન્ટરવ્યુમાં જણાવ્યું, ‘સુહાના ખાન અને શનાયા કપૂરને અનન્યા પાંડે એક્ટિંગ-ટિપ્સ આપી રહી છે! તેઓ નાનપણથી એકબીજાની ખૂબ નજીક કહી શકાય એવી પાક્કી બહેનપણીઓ છે!’ આ વાંચ્યા બાદ માથું કૂટવાનું મન એટલા માટે થયું કારણકે જો અનન્યા પાસેથી ટિપ્સ લઈ રહેલી બે નવી હિરોઈન બોલિવૂડને મળવાની હોય, તો એના કરતા હિન્દી ફિલ્મ-ઇન્ડસ્ટ્રીએ ઢાંકણીમાં પાણી લઈને ડૂબી મરવું વધારે બહેતર છે!

(ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(સંપર્ક)

ધાર્મિક – સામાજીક કાર્યક્રમો કે સમાચાર અંગે જાણકારી આપવા માટે 9978918796 પર વોટ્સએપ કરો અથવા કોલ કરો. અથવા તો funrangnews@gmail.com પર મેઈલ કરો.

(WhatsApp Group Link)

Funrang newsના વોટ્સએપ ગૃપમાં જોડાવા માટે આ લિન્ક પર ક્લિક કરો. https://chat. whatsapp. com/HudhfYxRO090FnzisUr3wz જેમને વોટ્સએપ ગૃપમાં એડ કરવા હોય એમને ન્યૂઝ ફોરવર્ડ કરો.