- ડાકોર ખાતે ગત તા. 23 જૂન 2019ના રોજ બનેલા બનાવનો ચુકાદો સંભળાવતી નડિયાદ સેશન્સ કોર્ટ.
નડિયાદ. ઘર પાસે અપશબ્દો નહીં બોલવા માટે ટોકનાર શખ્સની હત્યા કરવાના બનાવમાં સંડોવાયેલા ત્રણ આરોપીઓને આજરોજ નડિયાત સેશન્સ કોર્ટે આજીવન કેદની સજા ફટકારી હતી. જેને પગલે એમ કહી શકાય કે, સામાન્ય રકઝકે ઉગ્ર રૂપ ધારણ કરતાં ઘટેલી ઘટનામાં એક વ્યક્તિએ જીવ ગુમાવ્યો જ્યારે ત્રણ જણને આજીવન કેદ થઈ છે.
નાની અમથી વાતને મોટું સ્વરૂપ ધારણ કરતાં વાર નથી લાગતી. ઘણીવાર લોકો ઉપાધીને સામેથી નોતરું આપતાં હોય છે અને તેના દુષ્પરીણામ અનેક લોકોને ભોગવવા પડતાં હોય છે. કુનેહપુર્વક શાંતિથી ઉકેલ લાવી શકાય તેવી ઘટનાઓમાં ઉગ્રતા દાખવવી યોગ્ય નથી. એવી સમજ પૂરી પાડતો કિસ્સો ડાકોર ખાતે બનવા પામ્યો છે. જેમાં અંદરો અંદર અપશબ્દો બોલતાં લોકોને ટોકનાર શખ્સનો જીવ જવાથી એના પરિવારને ભોગવવાનો વારો આવ્યો છે. તો બીજી તરફ, હત્યા કરવાના ગુનામાં ત્રણ જણને આજવન કેદની સજા ફટકારવામાં આવતાં તેમના પરિવારજનોએ પણ વિના વાંકે સજા ભોગવવી પડે તેવી સ્થિતિ સર્જાઈ છે.
ગત તા. 23 જૂન 2019ના રોજ ડાકોરના રામજી મંદિર પાસે આવેલી ભક્તિ પાર્ક સોસાયટીમાં અખિલ રમેશચંદ્ર આગલ, જગદીશ બંસીલાલ શાહ અને સંજય બંસીલાલ શાહ કોઈ બાબતે બિભત્સ ગાળો બોલીને પસાર થઈ રહ્યાં હતાં. ભક્તિ પાર્ક સોસાયટીના એક મકાનમાં રહેતાં નિર્મલભાઈ પટેલે પોતાના ઘર પાસે અપશબ્દો ના બોલશો એમ કહીને આ ત્રણ જણને ટોક્યા હતાં. જેને પગલે તેઓની વચ્ચે માથાકૂટ થઈ હતી.
સાંજે પાંચ વાગ્યાના સુમારે વધુ એકવાર અખિલ રમેશચંદ્ર આગલ ભક્તિ પાર્ક સોસાયટીમાં આવેલાં નિર્મલભાઇના મકાન પાસેથી અપશબ્દો બોલતો પસાર થઈ રહ્યો હતો. તેથી નિર્મલ પટેલે વધુ એકવાર તેને ગાળો નહીં બોલવા ટોક્યો હતો. જેમાં ઉશ્કેરાઈ ગયેલા અખિલ ચાકુ કાઢ્યું હતું. જ્યારે એની સાથેના બે શખ્સોએ નિર્મલ પટેલને પકડી લીધો હતો. અખિલે આવેશમાં આવી નિર્મલ પટેલના પેટમાં ચાકુના ઘા ઝીંકી દીધા હતાં. ગંભીર રીતે ઘવાયેલા નિર્મલ પટેલને હોસ્પિટલમાં ખસેડાયા હતાં. જ્યાં સારવાર દરમિયાન તેમનું મોત નિપજ્યું હતું.
ઉપરોક્ત બનાવમાં 13 સાક્ષીઓ અને 42 જેટલાં દસ્તાવેજી પુરાવાઓ અને સરકારી વકીલની દલીલોને ધ્યાનમાં રાખી નડિયાદ સેશન્સ કોર્ટે ત્રણેય આરોપીઓને કસુરવાર ઠેરવી, રૂ. 20 હજારનો દંડ અને આજીવન કેદની સજા ફટકારી હતી.
અત્રે ઉલ્લેખનિય છે કે, નિર્મલ પટેલે ઉગ્રતા દાખવવાને બદલે કુનેહપૂર્વક શાંતિથી અખિલ સહિતના શખ્સો સાથે વાત કરી હોત તો કદાચ આજે આવું દુષ્પરિણામ આવ્યું ના હોત.
#funrang #Vadodara #Ahmedabad #Surat #Rajkot #Gandhinagar #gujaratnews #gujaratinews #latestnews #newsupdate
Please Subscribe my YouTube channel by clicking this link –
https://www.youtube.com/channel/UCi9Oagp-aUKUjbKKfN6H0gg