👉🏽 વડોદરા કોર્પોરેશનની ઢોર પાર્ટીથી બચવા મારે લોહી પાડવું પડ્યું, કાશ હું ગાય નહીં ગધેડો હોત… (જુઓ એક્સક્યુલિઝ વિડીયો)👈🏼

• શહેરના નવાપુરા વિસ્તારમાં ઢોર પાર્ટીથી બચવા માટે આઠેક ફૂટ ઉંચી દિવાલ કૂદનાર ગાયની કાલ્પનીક મનોવ્યથા અત્રે પ્રસ્તુત છે.
• ફનરંગના ફોટોજર્નાલિસ્ટ મનિષ વ્યાસ દ્વારા આ વિડીયો શૂટ કરવામાં આવ્યો છે.

[Funrang Founder / Editor – Mr.  Mehulkumar Vyas – 9978918796]

વડોદરા । પાડાના વાંકે પખાલીને ડામ આપવાની પરંપરા સત્તાધીશો દ્વારા અકબંધ રાખવામાં આવતી હોય છે. સત્તા મળવાને કારણે જાણે એમની પાસે કોઈ ચમત્કારીક શક્તિ આવી જતી હોય એવું માનનારા માછલીઓ બચાવી શકતાં નથી, ભ્રષ્ટાચાર રોકી શકતાં નથી પરંતુ, તગલઘી ફરમાનો કરવામાં માહિર હોય છે. અહીં તગલઘી જાણી જોઈને લખવામાં આવ્યું છે. કારણકે, હિન્દુત્વના નામે ચુંટાઈને આવેલાં નેતાઓ ઘણી બાબતોમાં પોતાની જાતને હિન્દુ કહેવડાવવાને લાયક નથી એવું કહેવાનો સ્પષ્ટ આશય છે. અગાઉ મંદિર તોડીને મૂર્તિઓ કચરામાં ફેંકી દેવાની ઘટના બની છે ત્યારે આ કટાક્ષ નથી આક્ષેપ છે. અને એનો આજરોજ સ્પષ્ટ પુરાવો વડોદરાના નવાપુરા વિસ્તારમાં મળ્યો છે.

શહેરમાં રખડતાં ઢોરને કારણે બે – ચાર અકસ્માતો થવાને કારણે મેયર કેયુર રોકડીયા તો ઠીક ભાજપા પ્રદેશ પ્રમુખ સી.આર.પાટીલે ગૌપાલકો સામે ભવાં ચડાવ્યા છે અને જેને કારણે કોર્પોરેશનની ઢોર પાર્ટી દ્વારા રખડતી ગાયોને (શહેરમાં રખડતી ભેંસો જોવા નથી મળતી એ માત્ર જાણ ખાતર) પકડવાની ઝૂંબેશ હાથ ધરી છે. જેના ભાગરૂપે આજે વડોદરાના નવાપુરા વિસ્તારમાં પોતાની ચુસ્ત કામગીરીનું પ્રદર્શન કરવા ગયેલી કોર્પોરેશનની ઢોર પાર્ટી અને પોલીસથી બચવા એક ગાયને લગભગ 8 ફૂટ ઉંચી દિવાલ કૂદવાનો વારો આવ્યો હતો. જેમાં એને ઇજા પણ પહોંચી હોવાનું સ્પષ્ટ જોવા મળ્યું હતું.

ફનરંગના ફોટોજર્નાલિસ્ટ મનિષ વ્યાસ દ્વારા સમગ્ર ઘટનાને કેમેરામાં કેદ કરવામાં આવી હતી. ત્યારે આ સમગ્ર ઘટનામાં ગાયના મનમાં શું ચાલતું હશે? એનો તાગ પામવાનો એક નગણ્ય પ્રયાસ અત્રે પ્રસ્તુત છે. તો હવે આગળની વાત ગૌમુખે…

આજની ઘટના પરથી મને લાગે છે કે કાશ હું ગાય નહીં ગધેડો હોત તો સારું થાત… બહું સાચું કહું ભારતમાં હિન્દુઓ દ્વારા ગાયને માતાની જેમ પુજવામાં આવે છે એવી વાતો મેં ગયા જન્મમાં જાણી હતી. અને મનોમન બ્રહ્માજીને પ્રાર્થના કરી હતી કે મને બીજા જન્મમાં ગાય બનાવે… બ્રહ્માજીએ મારી પ્રાર્થનાનો સ્વિકાર કર્યો અને હું આ જન્મે ગાય તરીકે અવતરી.

જોકે, મારા દુર્ભાગ્ય કે હું વડોદરા જેવા શહેરમાં જન્મી… મને નાનપણમાં ખાસ તકલીફ નહોતી પડી… થોડી સમજણી થઈ ત્યારે મારી માતા અને એમની સહેલીઓ પાસેથી જાણવા મળ્યું કે, વડોદરામાં તો છેલ્લાં ત્રીસેક વર્ષોથી હિન્દુવાદી ભાજપનું રાજ છે… એટલે આરામથી રસ્તા પર જઈને કચરો ખાઈ શકાશે. જોકે, ઘણાં સંસ્કારી નગરજનોએ મને ઘાંસ અને રોટલી પણ ખવડાવી અને પુણ્ય પ્રાપ્ત કર્યું છે એ વાત અલગ છે.

એકંદરે, મારું જીવન સુખરૂપ ચાલી રહ્યું હતું. મારાથી કોઈને કનડગત નહોતી. કોઈને ભેટી મારવી એ મારા સ્વભાવમાં જ નહોતું. આમેય ગાયને સમજદાર પ્રાણી ગણવામાં આવે છે, સામાન્ય સંજોગોમાં અમે કારણવગર કોઈને ભેટી મારતાં નથી. પણ, ખબર નહીં કેમ હવે પરિસ્થિતિ બદલાઈ ગઈ છે.

થોડાક સમય પહેલાં સાંભળ્યું કે, અમને શહેરના રસ્તા પર કચરો ચરવાનો અધિકાર નથી. ભલે અધિકારીઓ આખે આખી કચરાપેટીઓનું ગબન કરી જાય… સત્તાધારીઓ પોતાના સ્વાર્થ માટે કચરા જેવા કામ કરી જાય… પણ, અમને કચરો ચરવાનો અધિકાર નથી.

માનું છું કે, અમારી કેટલીક બહેનોએ રાહદારીઓને ઈજા પહોંચાડી છે અને એટલે આવા પગલાં લેવામાં આવ્યા છે. એ વાત જુદી છે કે, અકસ્માત સર્જનાર અમારી બહેનોને પકડવામાં પોલીસ તંત્ર અને પાલિક તંત્ર નિષ્ફળ નિવડે છે…. પણ, કશો વાંધો નહીં… મનેય શોખ નથી આ શહેરના ટ્રાફિક વચ્ચે કચરો ચરવાનો…

પણ, હું અયોધ્યાના ભગવાન રામના અને કાશી વિશ્વેશ્વર નાથના સોગંધ ખાઈને કહું છું મેં ક્યારેય કોઈને ભેટી મારી નથી. છતાં આજે સવારે વડોદરા મહાનગર સેવાસદનની ઢોર પાર્ટીએ મારી સાથે ત્રાસવાદી જેવું વર્તન કર્યુ. હું મઝાથી ચરી રહી હતી એ એમને ના ગમ્યુ, સત્તાધારીઓ અને અધિકારીઓના આદેશનું પાલન કરતાં હશે બિચારા…

નવાપુરા વિસ્તારમાં આમેય ગટરમાં દારૂની પોટલીઓ મળતી હોય છે… આવા વિસ્તારમાં ગાયને ચરવા જેવો કચરો પણ નથી હોતો… છતાં હું કંઈક ખાવાનું શોધી રહી હતી ત્યાં ઢોર પાર્ટી ત્રાટકી… હું ગભરાઈને એક એપાર્ટમેન્ટમાં પહોંચી ગઈ… ઢોર પાર્ટીના લોકોએ મને પકડવાનો પ્રયાસ કર્યો એટલે મારે ના છુટકે આઠેક ફૂટ ઉંચી દિવાલ કૂદીને બીજી તરફ જવું પડ્યું.

મારું લોહી દિવાલ પર પડ્યું એ તો ઠીક મારા કારણે એપાર્ટમેન્ટના લોકોના કલરનું પણ નુકશાન થયું. કોઈને મારા કારણે નાનું અમથું નુકશાન થાય એ પણ મને ગમતું નથી. હું એ લોકોની માફી માંગવા સક્ષમ નથી… અને કોર્પોરેશનવાળાને કોઈની માફી માંગવી ગમતી નથી… ભગવાન શ્રી રામ એપાર્ટમેન્ટવાળાઓનું કલ્યાણ કરે એવી પ્રાર્થના…

બહુ લાંબી વાત થઈ ગઈ છે… પણ, છેવટે એટલું કહીશ કે, કાશ હું ગાયને બદલે ગધેડો કે કૂતરો હોત… કોર્પોરેશનવાળા મારી સાથે આવું વર્તન તો ના જ કરતાં હોત… શહેરમાં રોડ અકસ્માત થાય છે તો વાહનો ચલાવવા પર પ્રતિબંધ કેમ નથી લગાડી દેવાતો? કૂતરાંઓ રાહદારીઓને કરડતાં હોય છે, એમને પકડવા માટે કેમ ચુસ્તતા નથી બતાવવામાં આવતી? અને… ગધેડાઓ માટે તો કોઈ જ કાર્યવાહી નથી કરવામાં આવતી… બીજી રીતે કહું તો, ગધેડાઓને માન સન્માન પણ આપવામાં કોઈ કચાશ નથી છોડવામાં આવતી… ઠીક છે, જેવા મારા ભાગ્ય… શહેરમાં જન્મી એના કરતાં કોઈ નાનકડાં ગામમાં જન્મી હોત તો આજે મારા આવા હાલ ના થયા હોત…

જોકે, એક આશા છે… ચૂંટણી આવી રહી છે, અમારા ગૌપાલકોના મત મેળવવાની આશાએ થોડા દિવસ બાદ અમને રસ્તા પર આરામથી કચરો ચરવા દેવામાં આવે એવી શક્યતા જણાય છે. પણ, ત્યાં સુધી મારી તમામ ભગીનીઓ ભાઈઓ સાચવજો… ઢોર પાર્ટી હાલ એક્શનમાં છે…

લિ.

ગાય માતા તરફથી ભારત માતા કી જય…

(દાંડિયા બજાર વિસ્તારમાં ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(ધાર્મિક – સામાજીક કાર્યક્રમો અંગે જાણકારી આપો. )

9978918796 અથવા funrangnews@gmail.com પર મેઈલ કરો.

(ફનરંગ ન્યૂઝના વોટ્સએપ ગ્રૂપમાં જોડાવા માટે નીચેની લિન્ક પર ક્લિક કરો)

https://chat. whatsapp. com/HudhfYxRO090FnzisUr3wz