🎥 પ્રત્યેકને ડૂબાડશે ‘અનેક’! । ANEK Movie review by Parakh Bhatt 🎥

કેમ જોવી?: અનુભવ સિંહાએ ખેડેલાં વિષય અને આયુષમાન ખુરાનાના પર્ફોમન્સ માટે!

કેમ ન જોવી?: લાંબી, કંટાળાજનક અને ઊંઘપ્રેરક ફિલ્મ ન જોવી હોય તો!

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । ‘ભૂલભૂલૈયા-૨’એ હિન્દી ફિલ્મ ઇન્ડસ્ટ્રીમાં ફરી પ્રાણ ફૂંકવાનું કામ કર્યુ. ટૂંક સમયમાં જ ૧૦૦ કરોડ ક્લબમાં પ્રવેશ મેળવીને આ ફિલ્મ કાર્તિક આર્યનની નવી સુપરહિટ ફિલ્મ બની જવાની છે! કિયારા અડવાણીના ભાવ પણ હવે ઊંચકાઈ જવાના, એ નક્કી! એવામાં ગઈકાલે રીલિઝ થયેલી ફિલ્મ ‘અનેક’ બે મોટી ફિલ્મો વચ્ચેના શુક્રવારમાં ફસાઈને રહી જશે એવી ભીતિ હતી, પરંતુ ‘અનેક’ જોયા બાદ એવું લાગ્યું કે ‘ભૂલભૂલૈયા-૨’ અને આવતાં અઠવાડિયે રીલિઝ થવા જઈ રહેલી ફિલ્મ ‘પૃથ્વીરાજ’ની વચ્ચે ચોક્કસપણે ગાયબ થઈ જશે! કારણ છે, ફિલ્મ-મેકર્સની મૂંઝવણ, જે સમગ્ર ફિલ્મમાં સાફ સાફ દેખાઈ આવે છે. નોર્થ ઇસ્ટ એટલે ભારતના ઉત્તર-પૂર્વીય રાજ્યો (જેમકે આસામ વગેરે)માં ચાલતાં રાજકારણ અને અલગાવવાદી જૂથને ધ્યાનમાં રાખીને બનાવવામાં આવેલી પૉલિટિકલ થ્રીલર ‘અનેક’ ધુરંધર ડિરેક્ટર અનુભવ સિંહાની ફિલ્મ છે.

મૂળ વાર્તા એટલી કે ભારત સરકારના અંડરકવર ઑફિસર અમન ઉર્ફે જોશુઆ (આયુષમાન ખુરાના) ઉત્તર-પૂર્વીય રાજ્યમાં પોતાના મિશનને પાર પાડવા માટે પગ મૂકે છે. ડિરેક્ટર અનુભવ સિંહાએ આખી ફિલ્મમાં આ રાજ્યનું નામ ઉજાગર કર્યુ જ નથી. કદાચ એમનો હેતુ, પ્રેક્ષકો સમગ્ર નૉર્થ-ઇસ્ટની સમસ્યા કેન્દ્રમાં રાખીને ફિલ્મ જુએ એવો હોવો જોઈએ. આ અજાણ્યા રાજ્યમાં પહોંચેલા અમનને નૉર્થ-ઇસ્ટમાં શાંતિ સ્થાપવી છે. પરંતુ ત્યાંના અલગાવવાદી સંગઠનો અને સરકારના પોતાના માણસો તેનો આ મનસૂબો પૂરો થવા દેશે?

‘રા.વન’ જેવી ફ્લૉપ સુપરહીરો ફિલ્મના ડિરેક્ટર અનુભવ સિંહાએ વર્ષ ૨૦૧૮થી પોતાનો અવતાર બદલ્યો છે. એ સાલમાં આવેલી ‘મુલ્ક’, ત્યારબાદ વર્ષ ૨૦૧૯માં આવેલી ફિલ્મ ‘આર્ટિકલ ૧૫’, વર્ષ ૨૦૨૦માં થપ્પડ અને હવે ‘અનેક’ બાદ તેમણે દિગ્દર્શક તરીકે પોતાની કારકિર્દીની બીજી ઈનિંગ રમવાની શરૂ કરી છે, એમ કહી શકાય.

‘અનેક’નો વિષય સારો, વાર્તા પણ સારી.. આમ છતાં સ્ક્રીનપ્લે અને સંવાદોના મામલામાં ફિલ્મ-લેખકો સીમા અગરવાલ, યશ કેશવાની અને અનુભવ સિંહા થાપ ખાઈ ગયા છે. એટલી બધી ઘટના એકસાથે આકાર પામે છે, કે પ્રેક્ષકો મૂંઝાઈ જાય! ધૂમધડામ અને ખટખટ ચાલી રહેલી વાર્તા વચ્ચે પ્રેક્ષકો શ્વાસ લઈ શકે એટલી જગ્યા પણ મેકર્સે રહેવા નથી દીધી! અધૂરામાં પૂરું, વચ્ચે-વચ્ચે ટપકી પડતાં ગીતો તો સાવ બગાસાપ્રેરક છે!

આયુષમાન ખુરાનાનો દેખાવ અને અભિનય સારો, પરંતુ વાર્તાની આંટીઘૂંટી અને મેકર્સની દુવિધાનો શિકાર તે પણ બન્યો છે એવું સ્પષ્ટપણે દેખાઈ આવે. એના સિવાયના અન્ય કલાકારો – જે.ડી.ચક્રવર્તી, એન્ડિયા કેવિશુઆ, મનોજ પાહ્વા, કુમુદ મિશ્રા, લોઇતોંગબામ દોરેદ્ર – એ પોતપોતાના પાત્રોને ન્યાય આપવાની પૂરતી કોશિશ કરી છે, પરંતુ જ્યાં પોતાનો જ સિક્કો ખોટો હોય ત્યાં બિચારો ઝવેરી તો શું કરી શકવાનો? ફિલ્મ-મેકિંગના જુદા જુદા પાસાં સાથે જોડાયેલાં પ્રત્યેક માણસની મહેનતને ડૂબાડવાનું કામ કરશે ‘અનેક’!

bhattparakh@yahoo.com

ક્લાયમેક્સ: ભારતની પોતાની ‘મિસ વર્લ્ડ’ માનુષી ચિલ્લર છેવટે આવતાં અઠવાડિયે ‘પૃથ્વીરાજ’ ફિલ્મ અને યશરાજ બેનર હેઠળ ફિલ્મોમાં ડેબ્યુ કરશે. ઐશ્વર્યા રાય બચ્ચન અને પ્રિયંકા ચોપરાની માફક તેની કરિયર આગામી ભવિષ્યમાં કયા પડાવ સુધી પહોંચશે, તેની આછેરી ઝલક આવતાં શુક્રવારે મળી જવાની છે.

(દાંડિયા બજાર વિસ્તારમાં ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(ધાર્મિક – સામાજીક કાર્યક્રમો અંગે જાણકારી આપો. )

9978918796 અથવા funrangnews@gmail.com પર મેઈલ કરો.

(ફનરંગ ન્યૂઝના વોટ્સએપ ગ્રૂપમાં જોડાવા માટે નીચેની લિન્ક પર ક્લિક કરો)

https://chat. whatsapp. com/HudhfYxRO090FnzisUr3wz