🔆 સ્થાનિક ઊર્જાસ્વરૂપોની વૈજ્ઞાનિક ઉપયોગિતા શું છે? । Religiously Yours by Parakh Bhatt 🔆

શું તમે ક્યારેય વિચાર્યુ છે કે અમુક-તમુક સ્થળોએ જવાનું તમને શા માટે અત્યંત પસંદ છે? અથવા કેટલીક જગ્યાઓનું નામ સાંભળતાં જ શા માટે ત્યાં જવાનું લોકો ટાળતાં હોય છે?

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । કોઈપણ સાધક માટે સ્થાન દેવતા, ગ્રામ દેવતા, ઈષ્ટ દેવતા અને કુળદેવી જેવા શબ્દો અજાણ્યા નથી. પ્રત્યેક તંત્રોક્ત અને મંત્રોક્ત સાધનાઓની શરૂઆતમાં જ્ઞાની સાધક ‘દેવતા નમસ્કાર’ની પ્રથાને અનુસરે છે. આ દેવતાઓ કોણ છે, જેમને આહ્વાન આપ્યા વગર સાધનાસિદ્ધિ સંભવ નથી? શરૂઆત થાય છે, સ્વયં ગજાનન ગણેશથી! ત્યારબાદ ક્રમશઃ શ્રીગુરુ, ઈષ્ટ દેવતા, કુળદેવી, સ્થાન દેવતા, ગ્રામ દેવતા, બ્રહ્મા-સરસ્વતી, લક્ષ્મી-નારાયણ, ઉમા-મહેશ્વર, માતા-પિતા, સર્વ દેવતા અને છેલ્લે બ્રાહ્મણ દેવતા!

શ્રીવિદ્યાના પ્રખર ઉપાસક અને ‘સાધના’ મોબાઈલ એપ્લિકેશનના ફાઉન્ડર ઓમ સ્વામીના બે અંગ્રેજી પુસ્તકો ‘ધ એન્શિયન્ટ સાયન્સ ઑફ મંત્ર’ અને ‘ઈફ ટ્રુથ બી ટૉલ્ડ’માં આ વાતનો વિસ્તૃત દાર્શનિક ઉલ્લેખ જોવા મળે છે, પરંતુ મારે આજે વૈજ્ઞાનિક દ્રષ્ટિકોણથી સ્થાન દેવતા અંગે વિધિવત્ ચર્ચા કરવી છે.

શું તમે ક્યારેય વિચાર્યુ છે કે અમુક-તમુક સ્થળોએ જવાનું તમને શા માટે અત્યંત પસંદ છે? અથવા કેટલીક જગ્યાઓનું નામ સાંભળતાં જ શા માટે ત્યાં જવાનું લોકો ટાળતાં હોય છે? વાચકમિત્રોમાંથી ઘણા બધાંનો જાતઅનુભવ હશે કે કેટલાક વ્યવસાયોમાં ગમે એટલી મૂડી રોકો, મહેનત કરો, વિસ્તાર-વ્યાપનો પ્રયત્ન કરો પરંતુ એ ધંધામાં ક્યારેય બરકત જોવા જ નહીં મળે! તમે સતત એવું અનુભવશો કે યોગ્ય દિશામાં કઠોર પરિશ્રમ, પૂરતું પ્લાનિંગ, બિઝનેસ સ્ટ્રેટેજી અને રાત-દિવસ ઉજાગરા કરવા છતાં જોઈએ એવું પરિણામ નથી મળી રહ્યું!

આની પાછળના કારણોમાં વાસ્તુશાસ્ત્ર ઉપરાંત સ્થાન દેવતા અને ગ્રામ દેવતાનો ફાળો ખૂબ મોટો હોય છે. અષાઢી નવરાત્રિ પૂર્ણ થઈ, ત્યારે કળશ-ઉત્થાપનની પૂજામાં બ્રાહ્મણ દેવતાએ ચાતુર્માસ સંબંધિત બહુ જ રસપ્રદ વાત મારી સાથે કરી. સ્વયં વાલ્મિકી ઋષિ ‘રામાયણ’માં લખે છે, ‘ચાતુર્માસ ચાલુ થતાંની સાથે જ દશરથનંદન રામે સીતાની શોધખોળ ચાર માહ સુધી અટકાવવાનો આદેશ આપ્યો.’ આ ચાર મહિના દરમિયાન સૃષ્ટિની પાલનકર્તા ઊર્જા અર્થાત્ શ્રીમહાવિષ્ણુ શયન અવસ્થામાં હોય છે. પ્રકૃતિ નવેસરથી પોતાની જાતને સજ્જ કરી રહી હોય છે. ચોમાસાની ઋતુમાં ધરતીના ગર્ભમાં રોપાયેલાં બીજ ધીરે ધીરે ઉછેર પામીને સૃષ્ટિ માટે અન્ન પેદા કરવાની જહેમતમાં લાગેલાં હોય છે. આખું વર્ષ જમીનમાં ગોંધાઈ રહેતાં નાના-મોટા કીટકો/જીવો ચાર મહિના દરમિયાન મુક્તપણે વિચરણ કરવા માટે બહાર નીકળી આવે છે! સમગ્ર મુદ્દાનો મૂળ ભાવાર્થ એ હતો કે જે ચાતુર્માસ દરમિયાન સ્વયં પ્રમુખ દેવતા વિષ્ણુ પોઢી જતાં હોય, એ સમયે ધર્મયાત્રા કે પછી અન્ય કોઈ પ્રકારની યાત્રા કરવી હિતાવહ નથી!

પરંતુ આજના સમયમાં તો કોઈને એક દિવસ પણ ઘરે બેસવું પોસાય નહીં! એટલે જ, હવે સ્થાન દેવતા અને ગ્રામ દેવતાની મહત્તા જાણવી જરૂરી થઈ જાય છે. તમે નોંધ્યું હશે, દરેક ગામ અથવા પ્રદેશના દેવતા કે પછી દેવી નિશ્ચિત હોય છે. દાખલા તરીકે, અમદાવાદના ગ્રામ દેવતા સ્વયં ભદ્રકાળી છે! એવી જ રીતે, ઉજ્જૈનમાં મહાકાળ, કેરળના તિરૂઅનંતપુરમ્ શહેરના ગ્રામ દેવતા શ્રીઅનંતશયનમ્ છે.

સાધુ-સંતો જ્યારે નવા પ્રદેશમાં થોડા દિવસો માટે વિશ્રામ કરવાનો નિર્ણય લે છે, ત્યારે સર્વપ્રથમ જે-તે સ્થળના ગ્રામ દેવતાની મંજૂરી લે છે. પૌરાણિક વિજ્ઞાન એવું કહે છે કે દરેક સ્થળની પોતાની ઊર્જા હોય છે, જેને અંગત ઉપયોગમાં લેવા માટે સર્વપ્રથમ તેની સામે મસ્તક ઝૂકાવવું જરૂરી છે. જે-તે સ્થળના જીવ-જંતુઓ, પશુ-પ્રાણી કે પક્ષી તેમજ અહિતકારી નકારાત્મક ઊર્જા સામે રક્ષણ મેળવવા માટે ગ્રામ દેવતાનું આહ્વાન જરૂરી છે.

જેવી રીતે અબોલ જીવને પ્રેમ આપવાથી તે તમને વ્હાલ કરે છે, એવી જ રીતે ગ્રામ દેવતાનું આહ્વાન કરવાથી એ તમને જે-તે સ્થળ પર વસવાટ અને વ્યવસાય કરવાયોગ્ય ઊર્જા પૂરી પાડે છે. સ્થાન દેવતા એ ગ્રામ દેવતાથી અલગ! ધારો કે, તમારા ઘરના મંદિરમાં વર્ષોથી સાત-આઠ દેવી-દેવતાઓના વિગ્રહો અથવા છબીઓ છે. તમારા વડીલો દાયકાઓથી તેની પૂજા-અર્ચના કરી રહ્યા છે, પરંતુ તમને કૃષ્ણ અથવા જગદંબા કે પછી શિવની સાધનાના માર્ગ પર આગળ વધવું છે. તો એનો અર્થ એમ નથી કે એ સિવાયની અન્ય પ્રાણ-પ્રતિષ્ઠિત ઊર્જાને તરછોડી દઈએ! આવા સમયે મંદિરમાં બિરાજમાન અન્ય તમામ દેવી-દેવતાઓ સાધક માટે ‘સ્થાન દેવતા’ બની જાય છે, જેને વંદન કર્યા બાદ વ્યક્તિ પોતાની મૂળ સાધના શરૂ કરી શકે છે.

આની પાછળનું સરળ કારણ એ છે કે, પોતાના સગા મા-બાપને તરછોડ્યા બાદ બહારના વૃદ્ધાશ્રમમાં દાન-ધર્માદો કરવા ન જવાનું હોય! જન્મદાત્રીને તરછોડીને પાલક માતાના ગુણગાન ન ગાવાના હોય! કૃષ્ણ ભલે યશોદાના ઘરે ઉછેર પામ્યા, પરંતુ માતા દેવકીને કંસના કારાગારમાંથી મુક્ત પણ એમણે જ કરાવ્યા હતાં!

bhattparakh@yahoo.com

(ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(સંપર્ક)

ધાર્મિક – સામાજીક કાર્યક્રમો કે સમાચાર અંગે જાણકારી આપવા માટે 9978918796 પર વોટ્સએપ કરો અથવા કોલ કરો. અથવા તો funrangnews@gmail.com પર મેઈલ કરો.

(WhatsApp Group Link)

Funrang newsના વોટ્સએપ ગૃપમાં જોડાવા માટે આ લિન્ક પર ક્લિક કરો. https://chat. whatsapp. com/HudhfYxRO090FnzisUr3wz જેમને વોટ્સએપ ગૃપમાં એડ કરવા હોય એમને ન્યૂઝ ફોરવર્ડ કરો.