🔆 નિષ્કિલન: મંત્રપાશ-મુક્તિનું દુર્લભ જ્ઞાન! । Religiously Yours by Parakh Bhatt 🔆

• મંત્રતિજોરી ખોલી શકવા માટે સાધકનો પાસવર્ડ એટલે નિષ્કિલન.
• આજની તારીખે પણ ૭૦૦ શ્લોકો ધરાવતી દુર્ગા સપ્તશતીનો પાઠ કરતાં પહેલાં શાપ-વિમોચન મંત્રનો પ્રયોગ અનિવાર્ય છે.

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । શિવના મુખેથી ઉચ્ચારાયેલાં તમામ મંત્રો પાસવર્ડ-પ્રૉટેક્શન હેઠળ છે! તેને એક એવી હાઇ-ટેક તિજોરીમાં બંધ કરવામાં આવ્યા છે, જેને દુનિયાનો સારામાં સારો હેકર પણ ખોલી શકે એમ નથી. જ્યાં સુધી સાધક પાસે પાસવર્ડ ન આવે, ત્યાં સુધી એ પોતાની મંત્રતિજોરી ખોલી શકવા સક્ષમ નહીં બને, એવું પ્રાવધાન છે! આ પાસવર્ડ એટલે… નિષ્કિલન!

સદાશિવ શંભો અને મહાદેવી પાર્વતી ભ્રમણ કરી રહ્યા હતાં, એ સમયે એમની નજર જંગલમાં ‘મહામૃત્યુંજય મંત્રજાપ’ કરી રહેલાં બ્રાહ્મણ ઉપર પડી. પાછલાં દસેક વર્ષોથી તે લગાતાર મહામૃત્યુંજયનો જાપ કરીને શિવને પ્રસન્ન કરવાની કોશિશ કરી રહ્યો હતો. તેનો અનન્ય ભક્તિભાવ જોઈને મા પાર્વતીને તેના પર કરૂણા જન્મી.

‘તમે તો ભોળાના ભગવાન કહેવાઓ, આમ છતાં હજુ સુધી આ સાધકને કેમ તેની સાધનાનું ઇચ્છિત ફળ નથી મળી રહ્યું… સ્વામી?’ પાર્વતીએ જિજ્ઞાસાવશ પ્રશ્ન પૂછ્યો.

‘એ દસ વર્ષથી મારી ભક્તિ કરી રહ્યો છે, એ તમારા ધ્યાનમાં આવ્યું પરંતુ તેના દ્વારા થતાં મંત્રોચ્ચારણ તમે સાંભળ્યા, દુર્ગા?’ શિવએ માર્મિક સ્મિત આપતાં સામો પ્રશ્ન પૂછ્યો.

એમનો વળતો સવાલ સાંભળી પાર્વતીએ બ્રાહ્મણના જાપ પર ધ્યાન કેન્દ્રિત કર્યુ.

ॐ त्र्यम्बकं यजामहे सुगन्धिं पुष्टिवर्धनम्

उर्वारुकमिव बन्धनान् मृत्योर्मुक्षीय मा मृतात् ॥

હવે દેવીને શિવના કથનનું રહસ્ય સમજાયું. વાસ્તવમાં મંત્રાંતે ઉચ્ચારાતાં मा मृतात् ના જાપમાં મોટી ક્ષતિ હતી. વાસ્તવિક મંત્રના અંતે मामृतात् (मा + अमृतात्)નું ઉચ્ચારણ કરવાનું હોય છે.

દેવીના મુખારવિંદને કળી ચૂકેલાં મહાદેવ હળવેકથી બોલ્યા, ‘જેનો અર્થ એમ થાય કે બ્રાહ્મણ પોતાની દસ વર્ષની સાધના દરમિયાન આત્માનાં અમરત્વ (मा + अमृतात्) નહીં, પરંતુ પોતાના પામરપણાંની જ યાચના (मा + मृतात्) કરતો રહ્યો! હવે તમે જ કહો, દેવી… સાધકને હું કેવી રીતે દર્શન આપું? ઉલ્ટું, દસ વર્ષથી તે મહામૃત્યુંજય સાધના થકી પોતાની જ અધોગતિનો ખાડો ખોદી રહ્યો છે!’

શિવના વેણ સાંભળી પાર્વતી દુઃખી થઈ ગયા. આખરે કઈ મા પોતાના સંતાનની મહેનતનું યોગ્ય ફળ ન મળે એવું ઇચ્છે? જગદંબા પણ હવે શાંત બેસે એમ નહોતાં. એમના અંતરાત્મામાં જાગૃત માતૃત્વ હવે સૃષ્ટિના તમામ જીવોના કલ્યાણનો વિચાર કરવા લાગ્યું.

‘આવું તો ન ચાલે, આર્ય. સાધકનો ભક્તિભાવ અનન્ય હોય, ત્યારે એમના મંત્રોચ્ચારણના દોષને કેમ મહત્વ મળે? મારા બધા સંતાનો એકસરખા થોડાં હોય? તમારી ભક્તિના ફળસ્વરૂપ તેમને દોષયુક્ત જીવન જીવવું પડે એ કેમ પોસાય?’ પાર્વતીએ હઠ પકડી.

શિવને ખબર હતી કે જ્યાં સુધી દેવીને ઉપાય નહીં સૂચવવામાં આવે, ત્યાં સુધી તેઓ શાંત બેસવાના નથી.

‘ઠીક છે. કેટલાક ચોક્કસ મંત્રોને બાદ કરતા બાકીના તમામ મંત્રો પર હું કીલન-પ્રયોગ કરી રહ્યો છું.’ શિવએ ઉપાય સૂચવતાં કહ્યું.

‘અર્થાત્ પ્રભુ?’ પાર્વતીએ પૂછ્યું.

‘અર્થાત્ મંત્રના ખોટા ઉચ્ચારણથી થતાં દુષ્પ્રભાવથી સાધકોને બચાવવા માટે હું પરાપરરહસ્ય ધરાવતાં સમસ્ત બ્રહ્માંડના જાગૃત મંત્રોને બાંધી રહ્યો છું. હવેથી કોઈ પણ વ્યક્તિ ક્ષતિગ્રસ્ત અથવા ત્રુટિયુક્ત મંત્રસાધના કરશે, તો પણ તેના પર ક્યારેય કોઈ આપત્તિ નહીં આવે.’

એ દિવસથી સૃષ્ટિના સર્વવિદિત અને અપવાદરૂપ મંત્રોને બાદ કરતાં મોટાભાગના મંત્રો એક અદ્રશ્ય બંધનમાં બંધાઈ ગયા. આજની તારીખે પણ ૭૦૦ શ્લોકો ધરાવતી દુર્ગા સપ્તશતીનો પાઠ કરતાં પહેલાં શાપ-વિમોચન મંત્રનો પ્રયોગ અનિવાર્ય છે, નહીંતર સાધકને તેની ઉપાસના કે પૂજા-અર્ચનાનું યોગ્ય ફળ મળતું નથી.

સરળ ભાષામાં સમજાવું તો, શિવના મુખેથી ઉચ્ચારાયેલાં તમામ મંત્રો હવે પાસવર્ડ-પ્રૉટેક્શન હેઠળ છે! તેને એક એવી હાઇ-ટેક તિજોરીમાં બંધ કરવામાં આવ્યા છે, જેને દુનિયાનો સારામાં સારો હેકર પણ ખોલી શકે એમ નથી. જ્યાં સુધી સાધક પાસે પાસવર્ડ ન આવે, ત્યાં સુધી એ પોતાની મંત્રતિજોરી ખોલી શકવા સક્ષમ નહીં બને, એવું પ્રાવધાન છે!

આ પાસવર્ડ એટલે, નિષ્કિલન! રુદ્રયામલ તંત્ર અને ખાસ કરીને સપ્તશતીના ૭૦૦ શ્લોકોને અનલૉક કરવા માટે સર્વપ્રથમ નિષ્કિલન જરૂરી છે… નહીંતર સાધક ગમે એટલું ‘આહ્વાયામિ તર્પયામિ’ કરે, તો પણ વ્યર્થ નીવડશે! દુર્ગા સપ્તશતીનો પાઠ કરતા પહેલાં ‘શાપવિમોચન મંત્ર’નો જાપ કરવો આવશ્યક છે, એ જ્ઞાન આજની પેઢી સુધી પહોંચી શક્યું નથી. અલબત્ત, આનો અર્થ એમ નથી કે શાપવિમોચન મંત્રનો પ્રયોગ કર્યા વગર સાધકે કરેલાં ચંડીપાઠ ફળ ન આપે! બિલ્કુલ આપે. જગતજનની મહામાયા એવું ક્યારેય ન ઈચ્છે કે એમના સંતાનની સાધના નિષ્ફળ જાય. પરંતુ હા, એટલું ખરું કે ચંડીપાઠને શાપમુક્ત કર્યા બાદ સાધકને મળતું ફળ અનેકગણું વધારે હોય છે!

ઓમ સ્વામીએ તો એમના અંગ્રેજી પુસ્તક ‘એન્શિયન્ટ સાયન્સ ઓફ મંત્ર’’માં પોતાની સાધના અંગે વિસ્તૃત વર્ણન કર્યુ છે. સાધના વેળાના એમના અનુભવો, સિદ્ધ થયા બાદની અનુભૂતિઓ અને મંત્રસાધના માટે જરૂરી તમામ બાબતો વિશે તેમાં વિગતવાર ચર્ચા થઈ છે. એમની મોબાઈલ એપ્લિકેશન ‘સાધના’ થકી હાલ વિશ્વના અસંખ્ય શ્રદ્ધાળુઓ આ પંથ પર ચાલી રહ્યા છે.

bhattparakh@yahoo.com

(દાંડિયા બજાર વિસ્તારમાં ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(ધાર્મિક – સામાજીક કાર્યક્રમો અંગે જાણકારી આપો. )

9978918796 અથવા funrangnews@gmail.com પર મેઈલ કરો.

(ફનરંગ ન્યૂઝના વોટ્સએપ ગ્રૂપમાં જોડાવા માટે નીચેની લિન્ક પર ક્લિક કરો)

https://chat. whatsapp. com/HudhfYxRO090FnzisUr3wz