🔆 કાલીની દક્ષિણાચાર સાધના અંગે તમે કેટલું જાણો છો? । Religiously Yours by Parakh Bhatt 🔆

કાલી એક એવી મહાવિદ્યા (Greater Wisdom) છે, જે દારૂ-માંસના સેવનને નહીં પરંતુ સાત્ત્વિક જીવનને પ્રોત્સાહન આપે છે. તંત્રશાસ્ત્રમાંથી કાલી માતાનો ખોટો અને વિકૃત અર્થ ફેલાવનારા મહુઆ મોઇત્રા જેવા તુંડમિજાજી – ઉદ્ધત મૂઢમતિઓએ કાલીના વૈજ્ઞાનિક સ્વરૂપને સમજવું જોઈએ.

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । લીના રૌદ્ર સ્વરૂપના મર્મને સમજ્યા વગર એમના ઉપર ટિપ્પણી કરનારાઓ ઉપર હવે ગુસ્સો નહીં, પરંતુ દયા આવે છે! અજ્ઞાનતાના અંધકારમાંથી બહાર નીકળવાના પ્રયત્નો કરવાને બદલે તેઓ એમાં વધુ ને વધુ ઊંડે સપડાઈ રહ્યા છે. ટૉરન્ટો-બેઝ્ડ ફિલ્મ-મેકર લીના મણિમેકલાઈએ તો ખેર પોતાની ફિલ્મ ‘કાલી’ માટે જે વિવાદ ઊભો કર્યો, એ તેની છીછરી માનસિકતા દર્શાવે છે. ત્યારબાદ, મહુઆ મોઇત્રાએ મહાકાળી અંગે જે વિધાન ઉચ્ચાર્યુ, એના પર પૉલિટિકલ નહીં પરંતુ તાંત્રિક અને વૈજ્ઞાનિક દ્રષ્ટિકોણથી ગોષ્ઠિ થવી જોઈએ. તૃણમૂલ કૉંગ્રેસની આ સાંસદે કહ્યું કે ‘મારા માટે કાલી દારૂ અને માંસનો સ્વીકાર કરનારી દેવી છે!’

‘શ્રી લલિતાસહસ્રનામ’ જણાવે છે:

मूलाधारैक निलया, ब्रह्मग्रन्थि विभेदिनी ।

मणिपूरान्त रुदिता, विष्णुग्रन्थि विभेदिनी ॥

आज्ञा चक्रान्तरालस्था, रुद्रग्रन्थि विभेदिनी ।

सहस्राराम्बुजा रूढा, सुधासाराभि वर्षिणी ॥

સરળ ભાવાર્થ એ કે મૂળાધાર ચક્રમાં જેનો નિવાસ છે, એ મહાશક્તિ બ્રહ્મગ્રંથિનું વિભેદન કરે છે; ત્યારબાદ મણિપૂર ચક્રમાં પહોંચીને વિષ્ણુગ્રંથિ અને આજ્ઞા ચક્રમાં પહોંચીને રૂદ્રગ્રંથિનું વિભેદન કરે છે. તત્પશ્ચાત્ બ્રહ્માંડજનની પોતાના સંતાનના સહસ્રાર ચક્રમાં વિદ્યમાન થઈને અમૃતવર્ષા (સમાધિસ્થ તુરીયઅવસ્થા)નું વરદાન આપે છે.

બ્રહ્મગ્રંથિ, વિષ્ણુગ્રંથિ અને રૂદ્રગ્રંથિ એ વાસ્તવમાં ત્રિગુણ – સત્ત્વ, રજસ અને તમસ; ત્રણ અવસ્થા – જાગૃત, સુષુપ્ત અને સ્વપ્ન; ત્રણ નાડી – ઇડા, પિંગળા અને સુષુમ્ણાનું રૂપક છે. શક્તિસ્વરૂપા વાસ્તવમાં ત્રિગુણાત્મિકા છે; ત્રયતાપ – આધિ, વ્યાધિ, ઉપાધિ – નો નાશ કરનારી છે.

કાલી દસ મહાવિદ્યાઓમાંની સર્વપ્રથમ મહાવિદ્યા છે, જેની સાધના બે પ્રકારે થાય છે: દક્ષિણાચાર અને વામાચાર. મહુઆ મોઇત્રાનું વિવાદિત નિવેદન એ દર્શાવે છે કે એમને કાલીની ફક્ત વામાચાર સાધના અંગે જ જ્ઞાન છે, દક્ષિણાચાર સાધના અંગે નહીં. વામાચારના સાધકો પંચ ‘મ’કાર – મદ્ય, માંસ, મુદ્રા, મત્સ્ય, મૈથુન – નો ઉપયોગ કરીને દેવીને સિદ્ધ કરે છે; પરંતુ દક્ષિણાચારના સાધકો વિધિ દરમિયાન સાત્ત્વિક ચીજ-વસ્તુઓ – પુષ્પ, કંકુ, ચોખા વગેરે – નો ઉપયોગ કરે છે. તંત્ર અંગે ભ્રમમાં જીવનારા મોટાભાગના લોકોને એ ખ્યાલ નથી કે દસમાંથી ફક્ત ત્રણ જ મહાવિદ્યાઓ – ત્રિપુરભૈરવી, ધૂમાવતી, છિન્નમસ્તા – એવી છે, જેની કોઈ દક્ષિણાચાર સાધના નથી! આ ત્રણ મહાવિદ્યાઓને ફક્ત વામાચાર સાધના થકી સિદ્ધ કરી શકાય છે.

દેવી-દેવતાના તામસી સ્વરૂપોને અર્પણ કરવામાં આવતો મદિરા તેમજ બીડી-સિગારેટને ‘કૂલ’ માનતાં યુવાધનને આ પ્રસંગે ખાસ કહેવાનું કે સમયા-જાણ્યા-વિચાર્યા અને ઊંડા ઊતર્યા વગર ફક્ત સગવડિયા ધર્મને અનુસરવો એ મૂર્ખામી છે! મદ્ય-માંસ, બીડી-સિગારેટ અને અન્ય નશાપ્રેરક ચીજ-વસ્તુઓનું સેવન એ તાંત્રિકો અથવા અઘોરીઓ જ કરે છે, જેમને ભયાવહ સાધનાઓ કરવાની કરવાની હોય છે. વામાચાર એ કઠિન માર્ગ છે. ભલભલા બહાદુર લોકોના અહીં કાળજા બેસી ગયાના ઉદાહરણો છે. સંસાર ત્યાગીને સંપૂર્ણપણે વામાચારી તંત્રમાર્ગને અનુસરતા સાધકો જ નશાકારક ચીજ-વસ્તુઓનું સેવન કરે છે, જેથી એમને તામસી-ઉપાસનાઓ (જેમકે, શવસાધના) કરવાનું બળ મળી રહે. તેઓ માદક દ્રવ્યના માધ્યમથી પોતાના મસ્તિષ્કને આ પ્રકારની દુષ્કર અને સંસારીઓ માટે વર્જ્ય કહી શકાય એવી સાધના માટે પોતાની જાતને તૈયાર કરતા હોય છે.

મહુઆ મોઇત્રાએ કહ્યું કે ‘તારાપીઠ’ જઈને જુઓ તો સમજાશે કે દેવીને પ્રસાદમાં શું ધરાવવામાં આવે છે! અહીં સૌથી અગત્યની વાત એ છે કે કાલી, તારા, બગલામુખી જેવા પ્રત્યેક રૌદ્ર શક્તિ-સ્વરૂપો સાધકને માંસ-મદિરાનું સેવન કરવાનો નહીં, પરંતુ એમાંથી બહાર આવીને (‘લલિતાસહસ્રનામ’માં કહ્યું છે એમ, કુંડલિનીને સહસ્રારચક્ર સુધી લાવીને) સમાધિ-અવસ્થા સુધી પહોંચવાનો સંદેશ આપે છે.

આખું જીવન જેમણે દક્ષિણાચાર સાધના કરી, એવા શ્રીવિદ્યા ઉપાસક અને ‘સાધના’ મોબાઈલ એપ્લિકેશનના ફાઉન્ડર

ઓમ સ્વામીએ પણ જ્યારે કામાખ્યા (ગુવાહાટી, આસામ) ખાતે વામાચાર તંત્રદીક્ષા લેવી પડી, ત્યારે મદિરાનું ફક્ત સૂક્ષ્મ-પ્રસાદ તરીકે સેવન કર્યુ હતું. વામાચારી સાધક જો ઈચ્છે, તો મદિરા અને માંસનો સાવ નહીવત્ માત્રામાં ફક્ત ખપ પૂરતો ઉપયોગ પણ કરી જ શકે! જેવી રીતે નિશ્ચિત માત્રામાં અપાયેલો આલ્કોહોલ દવાનું કામ કરી શકે, એવી રીતે સાધનાવિજ્ઞાનમાં વપરાતા દારૂ અને માંસ પણ અનન્ય સિદ્ધિ પ્રદાન કરી શકે. પરંતુ સાધનાસિદ્ધિ માટે બેફામ દારૂ ગટગટાવવાનું વિધાન એકપણ શાસ્ત્રમાં લખાયેલું નથી.

તંત્રશાસ્ત્ર વાસ્તવમાં તમામ દુર્વ્યસનોમાંથી પસાર થયા બાદ નિર્વ્યસની-નિર્લેપ-નિર્મોહી થવાનો સંદેશ આપે છે. પોતાની કામવાસના, સુખલાલસા અને સ્વાદગ્રંથિઓ પર નિયંત્રણ મેળવી ચૂકેલો માણસ શ્રેષ્ઠ સાધક પૂરવાર થતો હોય છે. સંસારના તમામ સુખ ભોગવ્યા બાદ, ત્રિ-અવસ્થા (સુષુપ્ત, જાગૃત અને સ્વપ્ન) માંથી બહાર લાવીને તુરીય અવસ્થાનો અનુભવ કરાવનાર તંત્રશાસ્ત્ર પર ટિપ્પણી કરવા માટે રાજકારણી નહીં, કઠોર સાધક બનવું પડે!

bhattparakh@yahoo.com

(ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(સંપર્ક)

ધાર્મિક – સામાજીક કાર્યક્રમો કે સમાચાર અંગે જાણકારી આપવા માટે 9978918796 પર વોટ્સએપ કરો અથવા કોલ કરો. અથવા તો funrangnews@gmail.com પર મેઈલ કરો.

(WhatsApp Group Link)

Funrang newsના વોટ્સએપ ગૃપમાં જોડાવા માટે આ લિન્ક પર ક્લિક કરો. https://chat. whatsapp. com/HudhfYxRO090FnzisUr3wz જેમને વોટ્સએપ ગૃપમાં એડ કરવા હોય એમને ન્યૂઝ ફોરવર્ડ કરો.