🔆 શ્રીવિદ્યા: અનેક-કોટિ બ્રહ્માંડજનની દિવ્ય-વિગ્રહા! | Religiously Yours by Parakh Bhatt 🔆

શ્રીવિદ્યાના ઉપાસક અને મહાત્રિપુરસુંદરી જેમને સિદ્ધ છે, એવા ગુરુ ઓમ સ્વામી કહે છે કે જેવી રીતે ગુરુ પોતાના શિષ્યની પસંદગી કરતા પહેલાં ત્રણ મહિના, છ મહિના કે એક વર્ષ સુધી તેની પરીક્ષા લે છે; એવી જ રીતે શિષ્યએ પણ પોતાના ગુરુની યોગ્યતાની કસોટી લેવી જરૂરી છે!

[Funrang Founder / Editor – Mr.  Mehulkumar Vyas – 9978918796]

પરખ ભટ્ટ । દસ પ્રચંડ મહાવિદ્યાઓ એટલે – કાલી, તારા, છિન્નમસ્તા, ષોડશી, ભુવનેશ્વરી, ત્રિપુરભૈરવી, ધૂમાવતી, બગલામુખી, માતંગી અને કમલા. દસ મહાવિદ્યાઓમાં ષોડશી અર્થાત્ મહાત્રિપુરસુંદરી અંગે આજે થોડી વાત કરવી છે. શ્રીવિદ્યાસાધનાની પ્રમુખ દેવી એટલે ચક્રનગરસામ્રાજ્ઞી રાજરાજેશ્વરી મહાત્રિપુરસુંદરી, જેને મુખ્યત્વે સૃષ્ટિક્રમ-સંહારક્રમ-સ્થિતિક્રમ પૂજાપદ્ધતિ વડે સિદ્ધ કરવામાં આવે છે. સંસારમાં રહીને દેવીઉપાસના કરનારા સાધકો મોટેભાગે સૃષ્ટિક્રમ પૂજા (બિંદુથી શરૂ કરીને બહારના ચક્ર સુધી)નો આગ્રહ રાખે છે, જ્યારે સંન્યાસીઓ/તંત્ર-ઉપાસકો બહારના આવરણથી મધ્યબિંદુ અર્થાત્ ‘સર્વાનંદમય ચક્ર’ સુધીની યાત્રા ખેડે છે. આદિ શંકરાચાર્ય વિરચિત ‘સૌંદર્યલહરી’ મુખ્યત્વે મહાત્રિપુરસુંદરીના દિવ્ય સ્વરૂપ અને સાધકો ઉપર તેની અસર અંગેની જ વાત કરે છે. કહેવાય છે કે, આદ્યગુરુ શંકરાચાર્ય દ્વારા ‘અહો પુરુષિકા’નું ઉચ્ચારણ થતાંની સાથે જ એમની સમક્ષ લલિતામ્બિકાનો આવિર્ભાવ થઈ જતો હતો!

ઘણાં વાચકોનો પ્રશ્ન હોય છે કે શ્રીવિદ્યાસાધના માટે ગુરુ દ્વારા અપાતી દીક્ષાનું મહત્વ કેટલું? શ્રીચક્રના પ્રથમ આવરણનું નામ છે: ત્રૈલોક્યમોહનચક્ર, જેની અધિષ્ઠાત્રી ત્રિપુરા અને યોગિની પ્રકટ છે. કુલ નવ આવરણનાં બનેલા શ્રીચક્રનું દ્વિતીય આવરણ છે: સર્વાશાપરિપૂરક ચક્ર! બીજા ચક્રની યોગિની ‘ગુપ્ત’ છે. પ્રથમ આવરણની ઉપાસના કરવા માટે સાધકને કોઈ ગુરુની આવશ્યકતા નથી, કારણ છે ‘પ્રકટ યોગિની’! પરંતુ બીજા આવરણમાં ‘ગુપ્ત યોગિની’ના આવિર્ભાવને કારણે સાધક માટે ગુરુદીક્ષા જરૂરી છે. મારો અંગત અનુભવ પણ મંત્રદીક્ષા પ્રાપ્ત થયા બાદનો જ છે, જેમાં મારા ગુરુએ મને ૧૨ વર્ષની વયે શ્રીવિદ્યા (સંહારક્રમ પૂજા) દીક્ષા આપીને તંત્રસાધનાનો માર્ગ ચીંધ્યો હતો.

દ્વિતીય આવરણથી શરૂ કરીને નવમા-અંતિમ આવરણ સુધીની ઉપાસના એ જ સાધક કરી શકે છે, જેમને શ્રીવિદ્યામાં દીક્ષા પ્રાપ્ત હોય! આજના સમયમાં બે-ત્રણ હજાર રૂપિયામાં શ્રીવિદ્યા દીક્ષા આપતાં ગુરુઓનો રાફડો ફાટી નીકળ્યો છે, ત્યારે મારે અહીં વાચકોને ખાસ જણાવવું પડે કે આવા એકપણ ઢોંગનો ભાગ બનવાની જરૂર નથી. એક વાત હંમેશા યાદ રાખજો. વિદ્યા ક્યારેય ખરીદી ન શકાય, એને અર્જિત કરવી પડે!

શ્રીવિદ્યાના ઉપાસક અને મહાત્રિપુરસુંદરી જેમને સિદ્ધ છે, એવા ગુરુ ઓમ સ્વામી કહે છે કે જેવી રીતે ગુરુ પોતાના શિષ્યની પસંદગી કરતા પહેલાં ત્રણ મહિના, છ મહિના કે એક વર્ષ સુધી તેની પરીક્ષા લે છે; એવી જ રીતે શિષ્યએ પણ પોતાના ગુરુની યોગ્યતાની કસોટી લેવી જરૂરી છે! દેવીની ઉપાસના માટે ઓમ સ્વામી નિર્મિત મોબાઇલ એપ્લિકેશન ‘સાધના’નો ઉપયોગ હાલ વ્યાપક પ્રમાણમાં થઈ રહ્યો છે.

ધ્યાનયોગ માટે ગુરુની આવશ્યકતા નથી હોતી, પરંતુ મંત્રયોગના માર્ગે ગુરુ વગર ઉદ્ધાર નથી! આજના સમયમાં શ્રીવિદ્યાના સિદ્ધ ઉપાસકોની સંખ્યા જૂજ છે. માટે, એની દીક્ષા લેતાં પહેલાં શિષ્યએ એ ચકાસવું ખાસ જરૂરી છે કે તમને આપવામાં આવતાં દીક્ષામંત્ર પર સ્વયં ગુરુ દ્વારા કઠોર સાધના થઈ છે કે નહીં? જો ગુરુનો શ્રીવિદ્યામંત્ર જ જાગૃત ન હોય, તો શિષ્ય પણ શ્રીવિદ્યાસાધનાના પંથ ઉપર આગળ નથી વધી શકતો.

એમાં પણ શ્રીવિદ્યાનું વિજ્ઞાન તો અત્યંત પૌરાણિક અને ગુપ્ત છે. જેવી રીતે કોઈપણ મંદિરમાં પ્રવેશ મેળવવા માટે ‘ગોપુરમ્’માંથી પસાર થવું પડે, એવી જ રીતે શ્રીવિદ્યાસાધનાનો પ્રારંભ કરતા પહેલાં ‘શ્રીબાલાત્રિપુરસુંદરી મંત્ર’ની સાધના જરૂરી છે. ભવિષ્યમાં ક્યારેક શ્રીવિદ્યા પર એક વિસ્તૃત લેખમાળા લખીશ, ત્યારે એના પૌરાણિક વિજ્ઞાનને પણ આધુનિક પરિપ્રેક્ષ્યથી સમજાવવાનો પ્રયત્ન કરીશ.

હાલ પૂરતું, ‘લલિતાસહસ્રનામ’માં ઉલ્લેખ થયો છે એ રીતે, ‘શ્રીમાતા શ્રીમહારાજ્ઞી શ્રીમત્-સિંહાસનેશ્વરી’ મહાત્રિપુરસુંદરીની કૃપા સૌ વાચકમિત્રો પર બની રહે એવી અભ્યર્થના.

(ક્રમશઃ)

bhattparakh@yahoo.com 

(ઓફિસ ભાડે – વેચાણ)

દાંડીયાબજાર વિસ્તારમાં શ્રી સિદ્ધિ વિનાયક મંદિરની સામે આવેલાં શ્રી સિદ્ધિવિનાયક સ્ક્વેરના પહેલા માળે ઓફિસ ભાડે – વેચાણથી આપવાની છે. રસ ધરાવતાં શખ્સો સંપર્ક કરે – 91736 11111

(સંપર્ક)

ધાર્મિક – સામાજીક કાર્યક્રમો કે સમાચાર અંગે જાણકારી આપવા માટે 9978918796 પર વોટ્સએપ કરો અથવા કોલ કરો. અથવા તો funrangnews@gmail.com પર મેઈલ કરો.

(WhatsApp Group Link)

Funrang newsના વોટ્સએપ ગૃપમાં જોડાવા માટે આ લિન્ક પર ક્લિક કરો. https://chat. whatsapp. com/HudhfYxRO090FnzisUr3wz જેમને વોટ્સએપ ગૃપમાં એડ કરવા હોય એમને ન્યૂઝ ફોરવર્ડ કરો.