- અક્ષયકુમાર અને અમિતાભ બચ્ચને પણ મોશન પોસ્ટર શેર કર્યું.
- સની દેઓલની આર. બાલ્કી સાથેની પહેલી ફિલ્મ 2022માં રિલિઝ થશે.
funrang. ઉત્કૃષ્ટ દિગ્દર્શક આર. બાલ્કી (R. Balki)ની આગામી ફિલ્મ ‘ચુપઃ રિવેંજ ઓફ ધ આર્ટિસ્ટ’નું મોશન પોસ્ટર રિલિઝ કરવામાં આવ્યું છે. 11 ઓક્ટોબરના રોજ મહાન નિર્માતા, દિગ્દર્શક અને અભિનેતા ગૂરુ દત્તની પુણ્યતિથિ નિમિત્તે ફિલ્મનું મોશન પોસ્ટર રિલિઝ કરીને એમને શ્રદ્ધાંજલી આપવામાં આવી છે. છેલ્લાં ઘણાં સમયથી આ ફિલ્મની ખૂબ ચર્ચાઓ હતી. ચુપ ફિલ્મમાં સની દેઓલ (Sunny Deol) દુલકર સલમાન, પૂજા ભટ્ટ અને શ્રેયા ધન્વંતરી મુખ્ય ભૂમિકાઓમાં જોવા મળશે.
મોશન પોસ્ટરમાં ગુરુ દત્તનો ફોટો છે અને બેકગ્રાઉન્ડમાં ગુરુ દત્તની લોકપ્રિય ફિલ્મ પ્યાસાનું ગીત યે દુનિયા અગર મિલ ભી જાએ તો ક્યા હૈ સાંભળવા મળે છે. મોશન પોસ્ટરમાં ગીતની અંતિમ કડીનો ઉપયોગ કરવામાં આવ્યો છે.. જલા દો ઇસે ફૂંક ડાલો યે દુનિયા, જલા દો, જલા દો… જલા દો ઇસે ફૂંક ડાલો યે દુનિયા… આ બોલની સાથે જ પોસ્ટર પર લોહી ટપકવા માંડે છે. આ મોશન પોસ્ટરથી એમ જણાય છે કે, આ ફિલ્મ ગુરુ દત્ત સાથે સંકળાયેલી છે.
દક્ષિણ ભારતનો એક્ટર દુલકર સલમાન આ ફિલ્મમાં મુખ્ય ભૂમિકા ભજવી રહ્યો છે. તેણે પોતાના ઇન્સ્ટાગ્રામ પર મોશન પોસ્ટર શેર કરીને લખ્યું છે કે, અમે આ દિવસની રાહ જોઈ રહ્યા હતાં, અમારી મહત્વાકાંક્ષી ફિલ્મ ‘ચુપઃ રિવેંજ ઓફ ધ આર્ટિસ્ટ’નો ફર્સ્ટ લુક.
(નવરાત્રિ સ્પેશિયલ ગુજરાતી ગીત “ગોરી હું તો તારા માટે” સાંભળવા નીચેની લિન્ક પર ક્લિક કરો.)
જ્યારે અક્ષય કુમારે મોશન પોસ્ટર શેર કરતાં લખ્યું છે કે, આ જોયા પછી તમે ચુપ નહીં રહી શકો, મારી પાસે ઘણાં પ્રશ્નો છે. શું શાનદાર પોસ્ટર છે. આ ફિલ્મ જોવાની ખૂબ જ તાલાવેલી સાથે રાહ જોઈ રહ્યો છું.
અમિતાભ બચ્ચને પણ મોશન પોસ્ટર શેર કરતાં લખ્યું છે કે, ચુપ મોશન પોસ્ટર. જ્યારે સની દેઓલ અને બોબી દેઓલે પણ મોશન પોસ્ટર શેર કરીને ટીમને શુભેચ્છાઓ પાઠવી છે.
અત્રે ઉલ્લેખનિય છે કે, આ ફિલ્મ આવતા વર્ષે 2022માં રિલિઝ થશે. આ ફિલ્મ આર. બાલ્કીએ લખી છે. અને આ પહેલીવાર બનશે કે જ્યારે તેઓ સની દેઓલ અને પૂજા ભટ્ટ સાથે કામ કરી રહ્યા છે. સની દેઓલની ફિલ્મ ગદર-2 પર પણ અનિલ શર્મા ઝડપથી કામ કરી રહ્યાં છે.
#Funrangnews #Entertainment